Deməzdim ki, idmanla heç bir əlaqəm yoxdur. Zamanla həm özüm həvəskar səviyyədə məşğul olmuşam, həm də hərdən bir az-az azarkeşlik edirəm.
Həvəskar kimi idmanın güləş, futbol və “krav-maqa” növləri ilə məşğul olmuşam. Güləş və futbola marağım uşaqlıq illərinə təsadüf edib. Yaşa dolduqca, həyat yolu mürəkkəbləşdikcə, uzaqlaşdım. Dərslərə, məktəb qayğılarına daha çox fokuslanmağım, 11 yaşımda olarkən yeni evə köçməyimiz əsas səbəbdir. Həm də yeni ev idman məktəblərindən uzaqda yerləşirdi.
“Krav-maqa” populyar olmadığı üçün bir-iki cümlə ilə haqqında yazım.
Küçə döyüşü kimi gənc idman növüdür. Detallarında müdafiəyə və bloklamaya daha çox yer verilir. Hücum yox səviyyəsindədir. Güc strukturları əməkdaşlarına öyrədilməsi də təsadüfi deyil. İsraildə yaradılmış döyüş növüdür.
Bu idmanla müvəqqəti məşğul olacağımı əvvəldən planlamışdım. Əsas işimlə yanaşı digər işgüzar fəaliyyətə başladım. Məşqi sona çatdırdım.
Hər hansı idman növünə davamlı azarkeşliyi məqsədəuyğun saymıram. Yarışlara baxdıqdan sonra yoldaşlarla uzun müzakirə vaxt itkisidir. Nəyinki idmanın, heç nəyin fanatı, asılısı deyiləm.
Müxtəlif idman yarışlarına yalnız boş vaxtım olarsa, lokal şəkildə baxıram və unuduram. Məsələn, dağda keçirilən motosiklet yarışı, korrida, ümumiyyətlə, futboldan savayı əksər yarışlara internetdə qarşıma çıxarkən baxıram.
Cavid Zahidoğlu
Redaktə etdi: İsmayıl Rafiqoğlu
