Silahlı dəstələrin fəaliyyəti Qəzza zolağına humanitar yardımın çatdırılmasına mane olur. Bu barədə “The New York Times” (NYT) İsrail rəsmiləri, BMT nümayəndələri və humanitar təşkilatlar arasında olan mənbələrə istinadən məlumat yayıb .
Onların məlumatına görə, radikal Fələstinin HƏMAS hərəkatının mövqeləri zəiflədikdən sonra anklavda yaranmış hakimiyyət boşluğunu mütəşəkkil cinayətkar qruplar doldurub. Bunun fonunda Qəzza sakinlərinə çatdırılan humanitar yardımları daşıyan yük maşınlarının talan edilməsi halları daha tez-tez baş verir. Belə ki, bu yük maşınlarından birinin sürücüsü nəşrə bildirib ki, noyabrda o, anklavın cənubunda “minlərlə funt” un götürən silahlı quldurlarla qarşılaşıb. Ertəsi gün cinayətkarlar BMT-nin göndərdiyi humanitar yardımı daşıyan yüzlərlə yük maşınından demək olar ki, bütün ərzaqları oğurlayıblar.
NYT-nin məlumatına görə, dəstələr sonradan oğurlanmış məhsulları “astronomik qiymətə” satırlar. Belə ki, Qəzzanın cənubunda 55 funt (24,9 kq) kisə unun qiyməti 220 dollara çatıb, cinayətkarların daha az aktiv fəaliyyət göstərdiyi anklavın şimalında isə eyni miqdarda unun qiyməti təxminən 10 dollara başa gələ bilər. BMT-nin Rəfahdakı nümayəndəsi Georgios Petropoulosun sözlərinə görə, humanitar yardımın ələ keçirilməsi “cinayətkar qruplar tərəfindən sistemli silahlı talan” və “külli miqyaslı soyğunçuluq” miqyasına çatıb. (Tass)