Azərbaycan Dövlət Akademik Musiqili Teatrında “O olmasın, bu olsun” komediyası fərqli quruluşda təqdim edilib.
Ritorika.az yazır ki, teatr iyulun 19-da 114-cü mövsümünü Üzeyr Hacıbəyovun musiqili komediyası ilə başa çatdırıb. Senariyə əlavə edilən yeni, kiçik koloritlər əsəri daha maraqlı edib. Səhnələşməyə müasirlik əlavə olunsa da, əsərin süjet xətti, mahiyyəti olduğu kimi qalıb. İki hissəli tamaşa anşlaqla keçib.
Tamaşanın rejissoru “Şöhrət” ordenli Xalq artisti Cənnət Səlimovadır. Səhnə əsərinin quruluşçu dirijoru Əməkdar incənət xadimi Nazim Hacıəlibəyov, quruluşçu rəssamı Əməkdar rəssam İsmayıl Məmmədov, dirijoru Əməkdar incəsənət xadimi Fəxrəddin Atayev, quruluşçu baletmeysterləri Əməkdar artistlər Zakir və Yelena Ağayevlər, xormeysteri Əməkdar artist Vaqif Məstanov, konsertmeysteri Fidan Məmmədova, rejissor assistentləri Elməddin Dadaşov və Sevinc Məmmədovadır.
Rollarda Xalq artisti Pərviz Məmmədrzayev, Əməkdar artistlər Şövqi Hüseynov, Nahidə Orucova, Əzizağa Əzizov, Əkbər Əlizadə, Nadir Xasiyev, aktyorlar Möylə Mirzəliyev, Əliməmməd Novruzov, Şaban Cəfərov, Hüseyn və Gültac Əlili, Təranə Əliyeva, eləcə də xor və balet artistləri çıxış edirlər.
Əsər fərqli quruluşda 1998-ci ildən təqdim edilir.
Cavid Zahidoğlu
