Son üç gün ərzində ABŞ və İsrailin dəstəklədiyi özəl Qəzza Humanitar Fondundan (GHF) yardım almağa çalışan onlarla Qəzza sakini ölüb və yaralanıb. BMT-nin İnsan Haqları üzrə Ali Komissarı Volker Türk deyib ki, bu hadisələr araşdırılmalıdır.
Türk “Qəzzada cüzi ərzaq əldə etməyə çalışan çarəsiz vətəndaşların ölümünə səbəb olan hücumları qəbuledilməz” adlandırıb. Onun sözlərinə görə, artıq üçüncü gündür ki, eyni GHF paylama məntəqəsi yaxınlığında insanlar öldürülür. O xatırladıb ki, mülki şəxslərə hücumlar “beynəlxalq hüququn ciddi şəkildə pozulması və müharibə cinayəti” təşkil edir.
“Bu səhər biz daha onlarla insanın öldüyü və yaralandığı barədə məlumat aldıq”, – BMT-nin İnsan Haqları üzrə Ali Komissarlığının (OHCHR) mətbuat xidməti onun sözlərindən sitat gətirir. “Bu hücumların hər biri ilə bağlı dərhal və qərəzsiz araşdırma aparılmalı və məsuliyyət daşıyanlar məsuliyyətə cəlb edilməlidir”. (Tass)