Macarıstanın baş naziri Viktor Orban Rusiya prezidenti Vladimir Putinə məktub göndərərək onu yenidən dövlət başçısı seçilməsi münasibətilə təbrik edib. Bu barədə TASS-ın müxbirinə Macarıstan hökumətinin başçısının mətbuat katibi Bertalan Havaşi məlumat verib.
“Seçkilərin rəsmi nəticələrinin açıqlanmasından sonra baş nazir Viktor Orban cümə axşamı (21 mart – TASS-ın qeydi) Vladimir Putinə məktub göndərərək, onu yenidən Rusiya Federasiyasının prezidenti seçilməsi münasibətilə təbrik edib. O qeyd edib ki, Macarıstan və Rusiya arasında əməkdaşlığın qarşılıqlı hörmətə əsaslanmasından məmnundur və bu, hətta indiki çox çətin geosiyasi vəziyyətdə belə mühüm məsələləri müzakirə etməyə imkan verir”, – deyə Havaşi bildirib.
Onun sözlərinə görə, Orban Putinə yazdığı məktubda “Macarıstan sülhün tərəfindədir” deyib. “Biz əminik ki, dialoqun davam etdirilməsi sülhün tezliklə bərqərar olması üçün zəruri şərtdir”, – deyə baş nazirin mətbuat katibi sitat gətirib. “Baş nazir Rusiya prezidentini əmin edib ki, Macarıstan ölkələrimiz arasında beynəlxalq hüquqla məhdudlaşdırılmayan sahələrdə əməkdaşlığı genişləndirməyə hazırdır”, – Havaşi əlavə edib.
Orban qeyd edib ki, dialoqun davam etdirilməsi Ukraynadakı münaqişənin tezliklə həlli üçün zəruri şərtdir.
(Tass)