Macarıstanın baş naziri Viktor Orban Gürcüstana rəsmi səfərə gəlib. Macarıstan hökuməti başçısının gəlişini əks etdirən kadrları Tbilisi Beynəlxalq Hava Limanından “İmedi” telekanalı canlı yayımlayıb.
Orbanın Gürcüstanın baş naziri İrakli Kobaxidze ilə görüş keçirəcəyi bildirilir. Geniş tərkibdə görüşlər də nəzərdə tutulub. Macarıstan nümayəndə heyətinə həmçinin ölkənin xarici işlər naziri Peter Szijjarto, iqtisadi inkişaf naziri Marton Nagy, maliyyə naziri Mihali Varqa, dövlət katibi Yanoş Naqi və digər rəsmi şəxslər daxildir.
Macarıstanın baş nazirinin səfəri iki gün davam edəcək. Orban hakim Gürcü Arzusu – Demokratik Gürcüstan partiyasını oktyabrın 26-da Gürcüstanda keçirilən parlament seçkilərində qazandığı qələbə münasibətilə təbrik edən ilk Avropa lideridir. (Tass)