Mədəniyyət Nazirliyinin dəstəyi və xaricdəki Azərbaycan Mədəniyyət mərkəzlərinin layihəsi əsasında milli mədəniyyətimizin təbliği, xarici ölkələrin aparıcı muzeyləri ilə əlaqələrin genişləndirilməsi, Azərbaycan mədəni irsinə dair təqdimatların, sərgilərin, təcrübə mübadiləsinin təşkili, habelə “Tanınmış azərbaycanlıların izi ilə” adlı layihənin reallaşdırılması həyata keçirilir.
AZƏRTAC xəbər verir ki, Türkiyədəki Azərbaycan Mədəniyyət Mərkəzi qardaş ölkənin muzeyləri ilə əməkdaşlığın genişləndirilməsi, milli mədəniyyətimizin, ortaq dəyərlərimizin təbliği məqsədilə ortaq layihələr reallaşdırır.
Bununla əlaqədar Azərbaycan Mədəniyyət Mərkəzi ilə Ankara Rəsm, Heykəl və Etnoqrafiya Muzeyi arasında ortaq layihələrin həyata keçirilməsi üçün razılıq əldə olunub.
Razılıq Azərbaycan Mədəniyyət Mərkəzinin direktoru Samir Abbasovla Ankara Rəsm, Heykəl və Etnoqrafiya Muzeyinin müdiri Erdem Akkurt arasında keçirilən görüşdə əldə olunub. Tərəflər il ərzində muzeydə Türkiyədə yaşayan, yaradıcılıqla məşğul olan azərbaycanlı tanınmış rəssamların birgə sərgisinin açılmasını da razılaşdırıblar.