Azərbaycan Gənclər Fondunun dəstəyi, “Qızılbaş” Gəncləri Maarifləndirmə İctimai Birliyi və Özbəkistandakı Heydər Əliyev adına Mədəniyyət Mərkəzinin birgə təşkilatçılığı ilə “Özbəkistan-Azərbaycan: Gənclərin İpək Yolu İqlim Forumu” işə başlayıb.
Mədəniyyət Mərkəzindən AZƏRTAC-a bildirilib ki, əvvəlcə forum iştirakçıları Ulu Öndər Heydər Əliyevin Daşkənddəki abidəsini ziyarət ediblər.
Sonra nümayəndə heyəti Azərbaycanın Özbəkistandakı səfiri Hüseyn Quliyev ilə görüşüb. Səfir görüşdə Forumun Azərbaycan və Özbəkistan üçün mühüm əhəmiyyətindən danışıb.
Daha sonra nümayəndə heyəti Özbəkistandakı Heydər Əliyev adına Mədəniyyət Mərkəzini ziyarət edib, orada Azərbaycanla bağlı mədəni fəaliyyətlərlə tanış olub. Mərkəzin sədr əvəzi Nadir Əlimirzəyev qonaqları mədəniyyət mərkəzinin fəaliyyəti ilə tanış edib.
Həmçinin Özbəkistan Həmkarlar İttifaqında media rəhbərləri ilə Forumun nümayəndə heyəti arasında görüş keçirilib. Görüşdə Azərbaycan-Özbəkistan qarşılıqlı media əlaqələri, ekoloji problemlərin həlli ilə bağlı müzakirələr aparılıb.
Qeyd edək ki, Forum işini Əlişir Nəvai adına Daşkənd Dövlət Özbək Dili və Ədəbiyyatı Universitetində davam etdirəcək.
