“Report”un Energetika Nazirliyinə istinadən verdiyi məlumata görə, bunu Azərbaycanın energetika naziri Pərviz Şahbazov Moskvada keçirilən “Rusiya Enerji Həftəsi” 6-cı Beynəlxalq Forumunda çıxışı zamanı bildirib.
Onun sözlərinə görə, enerji təhlükəsizliyi, iqtisadi əlçatanlıq və ekoloji davamlılıq nəzərə alındıqda enerji keçidi kifayət qədər uzun bir prosesdir: “Məhz özünün və tərəfdaşlarının enerji təhlükəsizliyini təmin etmiş ölkələr düzgün, rasional enerji keçidi siyasət həyata keçirə bilirlər”.
Qlobal enerji arxitekturasının yenidən dizayn olunduğu müasir reallıqlarda diversifikasiyanın əhəmiyyətinin artdığını vurğulayan nazir deyib ki, şaxələndirmə istehlakçı ölkələr üçün mənbələrin, enerji ölkələri üçünsə marşrutların, bazarların müxtəlifliyidir.
P. Şahbazov Azərbaycanda bütün növ enerji resurslarının işlənilməsi və müxtəlif istiqamətlər üzrə dünya bazarlarına çıxarılmasının hər zaman paralel həyata keçirildiyini, nəticədə Azərbaycan qazının regional və Avropa bazarlarına tədarük olunduğunu qeyd edib: “Azərbaycan qazı hazırda 7 ölkəyə nəql edilir. Cənub Qaz Dəhlizinin genişlənməsi, Həmrəylik Halqası və digər təşəbbüslər təchizat coğrafiyasının genişləndirilməsi perspektivi yaradır. Burada əlaqələndirilmiş fəaliyyətə və geniş əməkdaşlığa ehtiyac var”.
Türkiyənin uzun illər Azərbaycan qazının ən böyük bazarı olduğu və yeni bazarlara doğru planlarda da ölkəmizin vacib tərəfdaşı olduğu qeyd edilib.
Nazir neft-qaza mövcud münasibəti enerji təhlükəsiziliyi ilə yanaşı, ətraf mühit üçün də problemlərə yol açan, enerji bazarlarında qeyri-sabitliyi artıran yanaşma kimi dəyərləndirib. “Neft-qazdan tamamilə imtina 85 %-i karbohidrogenlərdən, 55 %-i neft-qazdan ibarət mövcud enerji sisteminin az bir vaxtda transformasiyasının və enerji trilemmasının həlli deyil”.
Qeyd edək ki, P. Şahbazov Rusiya Baş nazirinin müavini Aleksandr Novakın da qatıldığı sessiyada turbulentlik dövründə qlobal neft -qaz bazarı və Azərbaycanın qaz təchizatında prioritetləri ilə bağlı fikirlərini bölüşüb.