Parisin Respublika meydanında Fələstinə dəstək məqsədilə təşkil edilən icazəsiz nümayişin 10 iştirakçısı polis və jandarm tərəfindən saxlanılıb. Bu barədə BFMTV kanalı məlumat yayıb.
Bundan əlavə, daha 24 nəfər hakimiyyətin qadağan etdiyi nümayişdə iştiraka görə cərimələnib. Paris polis prefekturasının məlumatına görə, cümə axşamı axşam saatlarında meydana 3 min insan toplaşıb.
Daxili işlər naziri Gerald Darmaninin Fələstin tərəfdarı hər hansı nümayişi tamamilə qadağan etmək qərarına dair məlumat yayıldıqdan az sonra yerli vaxtla saat 18:15-də (Bakı vaxtı ilə 20:15) Respublika meydanında Fələstin tərəfdarlarının toplantısını yatırtmaq üçün hüquq-mühafizə orqanlarına əmr verilib. O vaxta qədər Paris meydanına toplaşan yüzlərlə insan “Azad Fələstin”, “Biz hamımız Fələstinliyik” şüarları səsləndirib, həmçinin meydanın mərkəzindəki abidənin üzərinə Fələstin bayraqları və pankartlar asıblar. Polis izdihamı ətraf küçələrə geri itələmək üçün qalxanlardan istifadə etməyə başlayanda izdihamdan ifadə azadlığı hüququna hörmətlə bağlı çağırışlar eşidilməyə başlayıb.
Daha sonra polis gözyaşardıcı qaz və su şırnaqlarından istifadə edib. Bu tədbirlərə baxmayaraq, aksiya iştirakçıları hüquq-mühafizə orqanlarının əməkdaşlarının əmrinə tabe olmayıb, bundan sonra dəyənəklərdən istifadə edərək həbslərə başlayıblar. (Tass)