Ermənistanın baş naziri Nikol Paşinyan və Böyük Britaniyanın xarici işlər nazirinin müavini Leo Doçerti İrəvanla Bakı arasında münasibətlərin normallaşması prosesini müzakirə ediblər. Bu barədə Ermənistan hökumətinin mətbuat xidməti məlumat yayıb.
“Ermənistan-Azərbaycan münasibətlərinin nizamlanması prosesi ilə bağlı məsələlər qaldırılıb. 2023-cü il mayın 14-də və iyulun 15-də Brüsseldə keçirilən üçtərəfli görüşlərdə razılaşdırılmış prinsiplər əsasında sülh prosesinin davam etdirilməsinin vacibliyi vurğulanıb”, – məlumatda deyilir.
Hökumət həmçinin bildirib ki, tərəflər Dağlıq Qarabağdan olan 100 mindən çox qaçqının humanitar problemlərini, eləcə də Ermənistan hökumətinin onların həlli istiqamətində atdığı addımları müzakirə ediblər. “Bu kontekstdə beynəlxalq ictimaiyyətin Dağlıq Qarabağ əhalisinə humanitar dəstəyin vacibliyi vurğulanıb”, – Nazirlər Kabinetindən bildirilib.
Baş nazir Ermənistan və Böyük Britaniya arasında əlaqələrin fəal olduğunu qeyd edərək, Ermənistan-Böyük Britaniya strateji dialoqunun bu yaxınlarda keçirilmiş ilk görüşünün əhəmiyyətini vurğulayıb. Paşinyan Ermənistan-Britaniya əməkdaşlığının böyük potensiala malik olduğuna və yüksək səviyyədə qarşılıqlı səfərlərin onun tam şəkildə həyata keçirilməsinə töhfə verəcəyinə əmin olduğunu bildirib. (Tass)