Ermənistanın baş naziri Nikol Paşinyan və NATO-nun baş katibi Mark Rutte Davosda keçirilən Dünya İqtisadi Forumu çərçivəsində İrəvan və Bakı arasında danışıqlar prosesini müzakirə ediblər. Bu barədə Ermənistan Nazirlər Kabinetinin mətbuat xidməti məlumat yayıb.
“Görüş zamanı həmsöhbətlər Ermənistan və NATO arasında əməkdaşlığın inkişaf etdirilməsi imkanlarını müzakirə edib, ikitərəfli gündəliyin səmərəli həyata keçirilməsinin vacibliyini vurğulayıblar. Tərəflər regional və beynəlxalq əhəmiyyətli məsələlər ətrafında fikir mübadiləsi aparıblar. Baş nazir Paşinyan danışıqların gedişatını təqdim edib. Ermənistan hökumətinin sülh gündəminə sadiqliyini vurğulayaraq Azərbaycanla sülh prosesini davam etdirir”, – bəyanatda deyilir.
Ermənistan Nazirlər Kabineti həmçinin bildirib ki, NATO baş katibi “regionda sülh və sabitliyin təmin edilməsinin vacibliyini vurğulayıb, xüsusilə NATO-nun Ermənistanın suverenliyi, ərazi bütövlüyü və sülhün bərqərar olmasına yönəlmiş səylərini dəstəklədiyini” qeyd edib. (Tass)