Rusiyalı jurnalistlərin Bakıda saxlanması ümumi qəbul edilmiş normalara və ikitərəfli münasibətlərin ruhuna qətiyyən uyğun gəlmir. Bu barədə Rusiya prezidentinin mətbuat katibi Dmitri Peskov brifinqdə bildirib.
“Söhbət konkret olaraq jurnalistlərdən gedir. Və təbii ki, media nümayəndələrinə qarşı bu cür tədbirlər ümumi qəbul edilmiş qayda və normalara, Rusiya-Azərbaycan münasibətlərinin ruhuna və xarakterinə qətiyyən uyğun gəlmir”, – o deyib.
İyunun 30-da Azərbaycan Daxili İşlər Nazirliyi hüquq-mühafizə orqanlarının Sputnik Azərbaycan informasiya agentliyinin ofisində əməliyyat keçirdiyini açıqlayıb. Daha sonra nazirlik agentliyin ofisində bir neçə nəfərin, o cümlədən Sputnik Azərbaycan-ın rəhbəri İqor Kartavıx və baş redaktor Yevgeni Belousovun saxlandığı barədə məlumat yayıb. Sputnik redaksiyası Azərbaycanda işləmək üçün heç bir rəsmi qadağa almadıqlarını, mümkün fikir ayrılıqlarının aradan qaldırılması üçün işçi qrupları səviyyəsində dialoqun aparıldığını bildirib.