Bunu “Report”a açıqlamasında politoloq İlqar Vəlizadə deyib.

Onun sözlərinə görə, Ermənistanın baş naziri Nikol Paşinyan ərazi anlayışlarının Ermənistan SSR-in ərazisi ilə üst-üstə düşdüyünü deməklə öz cəmiyyətini eksklavların Azərbaycana qaytarılmasına hazırlaşdırır:

“Biz bunu keçmişdə də görmüşük. Ola bilsin ki, Paşinyanın bu çıxışı müəyyən addımlar üçün qabaqlayıcı tədbir rolunu oynayır və insanları müəyyən məsələlərə sövq etməyə yönəlib. Ancaq düşünmürəm ki, bu çıxış Ermənistan cəmiyyətində birmənalı qarşılansın. Lakin hadisələr də onu göstərir ki, Ermənistan bu və digər şəkildə sülh gündəliyi qəbul etməyə və Azərbaycanın müəyyənləşdirdiyi dəst-xətlə hərəkət etməyə məcburdur. Çünki başqa yol yoxdur”.

Ekspert vurğulayıb ki, delimitasiya və demarkasiya prosesi fonunda bu cür çıxışlar təsadüfi ola bilməz:

“Fikrimcə, konkret olaraq eksklavların Azərbaycana qaytarılması ilə bağlı məsələlər qaldırılıb və müzakirə olunur. Düşünürəm ki, bu çıxış da məhz ona hesablanıb. Çünki biz bilirik ki, Ermənistan SSR dövründə eksklavlar tam Azərbaycana məxsus idi”.