Bunu AZƏRTAC-a polkovnik-leytenant Zöhrab İmanquliyev deyib. O qeyd edib ki, 2020-ci ildə Ali Baş Komandan İlham Əliyevin uzaqgörən siyasəti, Azərbaycan Ordusunun şücaəti nəticəsində biz əbədi və əzəli torpaqlarımıza qovuşduq.
“Vətəndaşlarımız hər zaman Ümummilli Lider Heydər Əliyevin “Mən həmişə fəxr etmişəm, bu gün də fəxr edirəm ki, mən Azərbaycanlıyam!” – ideologiyasını əsas götürüb. Müdrik rəhbərin bu kəlamı azərbaycançılığın ideya əsaslarına, hər bir soydaşımız üçün isə milli qürur mənbəyinə çevrilib. Azərbaycanda yaşayan digər millətlər də bizim vətəndaşlarımızdır.
Mən gənclərimizin gözündə qəhrəmanlıq, vətənpərvərlik hissini görürəm. Azərbaycan xalqı hər zaman şəhidlərimizin, onları böyüdən valideynlərin qarşısında baş əyir. Ümumiyyətlə, valideynlər övladlarına vətəni sevməyi, onun üçün canını verməyi öyrətməlidir. Bizim şəhidlərimiz müqəddəsdirlər. Onlar Vətən uğrunda öz canlarından keçiblər. Bəzi insanlar 100 il mənasız ömür yaşayır, bəziləri isə gənc yaşlarında şəhidlik zirvəsinə ucalaraq adını tarix səhifəsinə yazır. Şəhidlərimiz bizə qalib ölkənin vətəndaşı olmaq qürurunu yaşadıblar. Dünyanın bir çox ölkəsi İkinci Qarabağ savaşında parlaq Zəfərdən sonra Azərbaycana və xalqımıza daha böyük hörmətlə yanaşır”,- deyə Z.İmanquliyev bildirib.
