Münaqişə həll olunsa və Ukrayna tərəfi sülhməramlı missiya tələb etsə belə, Polşa öz hərbi personalını sülhməramlı kontingentin tərkibində Ukraynaya göndərməyəcək. Yaponiyada səfərdə olan Polşanın xarici işlər naziri Radoslav Sikorski bu barədə Yaponiya ictimai televiziyasına ( NHK) müsahibəsində bildirib.
“Bizim üçün ən vacib vəzifə Rusiya və Belarusla sərhədləri qorumaqdır”, – telekanal onun sözlərindən sitat gətirir. Eyni zamanda, Sikorski vurğulayıb ki, Polşa “Ukraynaya hərbi personal göndərmək istəyən ölkələr üçün maddi-texniki dəstək bazası” olmaqda davam edəcək. O əlavə edib ki, Varşava bu məqsədlər üçün xüsusilə aerodromlar və dəmir yolu infrastrukturu təmin edəcək.
Polşa Xarici İşlər Nazirliyinin rəhbəri həmçinin “Ukraynada atəşkəslə bağlı danışıqların bəzilərinin düşündüyündən qat-qat çətin olacağı” fikrini bildirib. Eyni zamanda o, Varşavanın Kiyevə dəstəyini davam etdirəcəyinə söz verib. (Tass)
