Vaşinqtonda ABŞ prezidenti Donald Trampla görüşdə Vladimir Zelenskini müşayiət edən bir sıra Avropa ölkəsinin liderləri Ağ Ev sahibinin Ukrayna nizamlanması ilə bağlı mövqeyinə heç bir şəkildə təsir göstərə bilməyəcəklər. Bu barədə Polşa Xarici İşlər Nazirliyinin rəhbərinin müavini Vladislav Teofil Bartoşevski Polsat telekanalının efirində bildirib.
“Əslində [Ukrayna ilə bağlı] qərarlar Amerikanın dar dairəsində qəbul ediləcək. Avropa nümayəndələri danışıqlarda iştirak etmirlər. Onların reallığa məhdud təsirləri olacaq. Orada qərarlar bir nəfər tərəfindən qəbul edilir”, – diplomat qeyd edib. O, həmçinin avqustun 18-də Ağ Evə dəvət olunanlar siyahısında Polşa nümayəndələrinin olmamasını Varşavanın beynəlxalq arenada o qədər də əhəmiyyətli mövqe tutmaması ilə izah edib. “Polşa orta ölçülü ölkədir. O, Almaniya və ya Böyük Britaniya ilə eyni beynəlxalq təsirə malik deyil”, – Bartoşevski izah edib. (Tass)