Polşa İsrail Müdafiə Qüvvələrinin (IDF) World Central Kitchen (WCK) avtomobilinə hücumu nəticəsində Qəzza zolağında həlak olan polşalı könüllünün ailəsi üçün İsrail hakimiyyətindən təzminat ödəməsini gözləmək hüququna malikdir. Bunu “Radio Zet” radiostansiyasının efirində respublikanın xarici işlər nazirinin müavini Anjey Şeyna deyib.
“Mənim üçün təbiidir ki, İsrail tərəfdən ölənin ailəsi üçün təzminat gözləyəcəyik”, – polşalı diplomat bildirib. O, İsrailin baş naziri Benyamin Netanyahunun Qəzzada baş vermiş hadisəni “qəza və gözlənilməz hadisə” kimi təsvir etməsini inandırıcı olmayan adlandırıb.
Bundan əvvəl Polşanın xarici işlər naziri Radoslav Sikorski israilli həmkarı İsrael Katzdan insidentlə bağlı izahat tələb edib və onun departamenti İsrail Hərbi Hava Qüvvələrinin humanitar təşkilatın avtomobilinə endirdiyi zərbəni pisləyib.
Çərşənbə axşamı günü müxtəlif təbii fəlakətlərin qurbanlarını pulsuz yeməklə təmin edən WCK, əməkdaşlarının Qəzza zolağının mərkəzində Deyr əl-Bəlahın cənubunda olarkən avtomobillərinin vurulması nəticəsində həlak olduqları barədə məlumat aldı. Ölən yeddi nəfər arasında dörd əcnəbi (Avstraliya, Böyük Britaniya, İrlandiya və Polşa vətəndaşları) var.
(Tass)