Polşa prokurorluğu Strateji Ehtiyatlar üzrə Hökumət Agentliyinin keçmiş rəhbəri Mişal Kuçmerovskinin (2021-2024) korrupsiyada şübhəli bilinərək qiyabi həbsinə order verib. Agentlik Ukraynaya yardım göstərməklə məşğul olub.
“Bizə mütəşəkkil cinayətkar dəstədə iştirakda (CM-nin 258-ci maddəsinin 1-ci bəndi) və maddi gəlir əldə etmək məqsədilə vəzifə səlahiyyətlərindən sui-istifadə və vəzifələrini yerinə yetirməməkdə (231-ci maddənin 1-ci və 2-ci bəndləri) ittiham irəli sürməyə imkan verən sübutlar əldə edilmişdir”- prokurorluğun saytındakı bəyanatda qeyd olunur. Dövlət qurumunun keçmiş rəhbərini 10 ilə qədər həbs gözləyir.
Katovitse məhkəməsi Kuçmerovski barəsində üç ay müddətinə həbs qərarı çıxarmağa razılaşıb. Milli Prokurorluğun sözçüsü Przemyslav Nowak bildirib ki, onun harada olduğu hələlik məlum deyil, təqsirləndirilən şəxs yaxın vaxtlarda axtarışa veriləcək. “Onet” portalının məlumatına görə, Kuçmerovski Şimali Kiprdə ola bilər. Ədliyyə orqanının nümayəndəsi eks-məmurun Ukrayna üçün nəzərdə tutulan elektrik generatorlarının oğurlanmasında iştirakda ittiham olunub-olunmadığını açıqlamayıb. (Tass)