Rusiya və ABŞ prezidentləri Vladimir Putin və Donald Trampın Alyaskada keçiriləcək görüşü ərəfəsində ABŞ-ın Kiyevdəki səfirliyi yaxınlığında aksiya təşkil olunub. Bu barədə “Kiyev 24” telekanalı məlumat yayıb.
Yayımlanan videoda aksiyanın təşkilatçıları Trampdan “Rusiya prezidenti ilə danışıqların ritorikasını və gündəliyini dəyişdirməyi, ərazilərin mübadiləsini “hamı üçün” formatında əsirlərin mübadiləsi ilə əvəz etməyi tələb edirlər. İştirakçılar aksiya üçün təkcə plakatlar deyil, həm də köynəklər və hətta ABŞ prezidentinə məktublar hazırlayıblar.
Fevral və mart aylarında Vaşinqton və Kiyev arasında münasibətlərin pisləşməsi fonunda artıq ABŞ səfirliyində bir sıra mitinqlər keçirilib. Həmin vaxt etirazçılar Trampın karikaturalarını əks etdirən plakatlar gətiriblər. Eyni zamanda, Ali Radanın müxalif fikirli deputatı Oleksandr Dubinski ABŞ-ın Kiyevdəki səfirliyində keçirilən etiraz aksiyalarının Ukrayna Təhlükəsizlik Xidməti (SBU) tərəfindən təşkil edildiyini qeyd edib.
Putinlə Trampın görüşü avqustun 15-də Alyaskada planlaşdırılır. Rusiya prezidentinin köməkçisi Yuri Uşakovun sözlərinə görə, sammitin əsas mövzusu Ukrayna böhranının nizamlanması olacaq. Vladimir Zelenskinin iştirakı gözlənilmir. (Tass)