Azərbaycan Respublikasının Birinci vitse-prezidenti Mehriban Əliyevanın təşəbbüsü ilə həyata keçirilən “Talassemiyasız həyat naminə” layihəsi çərçivəsində Qəbələ Rayon Mərkəzi Xəstəxanasında təşkil edilən qanvermə aksiyasında 180 nəfər könüllü qan verib.AZƏRTAC-ın bölgə müxbiri xəbər verir ki, Qəbələ Rayon İcra Hakimiyyətinin təşkilatçılığı, Milli Hematologiya və Transfuziologiya Mərkəzinin dəstəyi ilə keçirilən, Məhərrəmlik ayına təsadüf edən aksiyanın məqsədi talassemiya və hemofiliyalı xəstəliklərdən əziyyət çəkən insanlara kömək göstərmək, onlara dəstək olmaqdır.Qanvermə aksiyasında rayonun idarə, müəssisə və təşkilatlarının kollektivləri, həmçinin sakinlər fəallıq göstəriblər. Əvvəlcə hər bir donorun sağlamlığı yoxlanılıb. Müayinə nəticəsində səhhəti imkan verən şəxslərdən qan götürülüb.Toplanan qan laboratoriya müayinəsindən keçirildikdən sonra Mərkəzi Qan Bankına təhvil veriləcək və irsi qan xəstəliklərindən əziyyət çəkən insanların müalicəsində istifadə olunacaq.