Bir neçə Avropa nümayəndə heyəti Braziliyada keçirilən 20-lik Qrupunun (G20) sammitinin yekun kommünikesində Ukrayna münaqişəsi ilə bağlı Rusiyaya qarşı sərt ifadələr irəli sürdülər, lakin sonradan onların mövqeyinin birgə bəyanatın qəbulunu poza biləcəyindən narahat olduqları üçün bu tələblərdən imtina etdilər. Bu barədə “Financial Times” (FT) mənbələrə istinadən məlumat yayıb.
“İfadə kifayət qədər güclü deyil” deyir bir avropalı diplomat, “Ancaq heç kim çox uzağa getmək istəməzdi, əks halda mübahisələr başlayar və heç bir bəyanat olmazdı”. Nəşr başqa bir qərbli yüksək rütbəli diplomatın sözlərindən sitat gətirir: “Bu, Ukrayna ilə bağlı bizim görmək istədiyimiz dil deyil”.
G20 liderlərinin Rio-de-Janeyro sammitinin iştirakçıları tərəfindən qəbul edilmiş yekun bəyannamənin mətnində bildirilir ki, G20 ölkələri Ukraynada davamlı sülhün bərqərar olmasına yönəlmiş bütün konstruktiv təşəbbüsləri alqışlayır. G20 liderləri Ukrayna böhranının səbəb olduğu “insan əzabları və qlobal ərzaq və enerji təhlükəsizliyi üçün mənfi nəticələrə” xüsusi diqqət çəkiblər.
Noyabrın 18-dən 19-dək Rio-de-Janeyroda G20 ölkələrinin və Braziliyanın dəvət etdiyi ölkələrin liderlərinin iştirakı ilə G20 sammiti keçirilir. (Tass)