VAŞİNQTON, 13 avqust./TASS/. Qərb ölkələri Rusiya, ABŞ və Ukraynanın iştirakı ilə üçtərəfli sammitin Avropa və ya Yaxın Şərq şəhərlərindən birində keçirilməsini təklif ediblər. Bu barədə Reuters agentliyi öz mənbələrinə istinadən məlumat yayıb.
Onun həmsöhbətlərinin sözlərinə görə, bu məsələ çərşənbə günü ABŞ prezidenti Donald Tramp, Avropa ölkələrinin liderləri və Vladimir Zelenskinin iştirakı ilə keçirilən videokonfransda qaldırılıb.
Tramp daha əvvəl bildirib ki, bu həftə Alyaskada rusiyalı həmkarı ilə görüşü yaxşı keçərsə, Zelenski ilə Rusiya prezidenti Vladimir Putin arasında mümkün qədər tez üçtərəfli sammit keçirəcəyinə ümid edir.
Amerikanın CBS News telekanalı mənbələrə istinadən bildirir ki, Tramp administrasiyası artıq Rusiya və Ukraynanın iştirakı ilə üçtərəfli sammit keçirmək üçün mümkün yer axtarır və gələn həftənin sonunda onu təşkil etməyi gözləyir. (Tass)