Otuzillik işğal dövründə bir dəfə də olsun, azərbaycanlı qaçqın və məcburi köçkünlərin hüquqlarını yada salmayan avrokomissarların bugünkü yersiz canfəşanlığı, sadəcə, təəssüf doğurur. Münaqişənin həllindən sonra sülh müqaviləsinin imzalanmasına cidd-cəhdlə mane olan qlobal güclər yeni gərginlik ocağı yaratmağa çalışırlar.Bu fikirləri AZƏRTAC-a açıqlamasında Milli Məclisin deputatı Könül Nurullayeva söyləyib.Avropa Parlamentinin riyakar xislətini bir daha işə saldığını deyən deputat əlavə edib: “COP29”-öncəsi Azərbaycan əleyhinə qəbuledilməz, əsassız və tamamilə qərəzli bəyanatların şahidi oluruq. Ölkəmizin nüfuzlu tədbirə ev sahibliyi etməsini həzm edə bilməyən avrokomissarlar Azərbaycanın daxili işlərinə qarışmağa can atırlar. Bu dəfə də “insan haqları”ndan soyuq silah kimi istifadə cəhdlərini görürük. Özlərini jurnalist və ya insan haqları müdafiəçisi kimi təqdim edən şəxslərlə bağlı cinayət işlərinin siyasi motivli olması iddiasının heç bir əsası yoxdur. Əslində bu qərəzli yanaşma ilk dəfə deyil. Biz hər dəfə Azərbaycanın irimiqyaslı tədbirlərə ev sahibliyi etdiyi ərəfədə bu cür təzyiqləri, qarayaxma kampaniyalarını müşahidə edirik”.Deputatın sözlərinə görə, insan hüquq və azadlıqlarından çətir kimi istifadə edən riyakar avroparlamentarilər nədənsə Qərbi Azərbaycandan qaçqın düşmüş soydaşlarımızın hüquqlarını görməzdən gəlirlər. Etnik ermənilərə vəkillik edənlər Qərbi Azərbaycandan olan soydaşlarımızın qayıdış hüququ barədə bir dəfə də olsun məsələ qaldırmırlar. Halbuki Qarabağ münaqişəsi başa çatdıqdan sonra Azərbaycanla Ermənistan arasında dayanıqlı sülh əldə etmək, soydaşlarımızın qayıdışı üçün əlverişli fürsət yaranıb. Amma yaranmış bu fürsət Qərbdəki dairələrin riyakar marağına cavab vermir.“Ona görə də ekoloji problemlərin həlli üçün yaradılmış platformadan səmərəli istifadə etmək əvəzinə COP-u siyasiləşdirərək özlərini ifşa edirlər. COP və iqlim dəyişməsi ilə əlaqədar dünya Qərbdən yeni maliyyə öhdəlikləri gözləyir. Pul ayırmamaq üçün Qərb öz ənənələrinə sadiq qalaraq COP-a ev sahibliyi edən ölkəyə qarşı böhtan və şantaj kampaniyası aparır. Amma bu cür qarayaxma kampaniyalarının heç bir nəticəsi olmayacaq”, – deyən Könül Nurullayeva fikirlərini yekunlaşdırıb.
