BMT-nin Yaxın Şərqdəki Fələstinli Qaçqınlara Yardım və İşlər üzrə Agentliyinin (UNRWA) ən azı 198 əməkdaşı 2023-cü ilin oktyabrından Qəzza zolağında həlak olub. Bu məlumatı Əmmanda İordaniyanın baş nazirinin müavini və xarici işlər naziri Ayman əs-Səfədi ilə danışıqlardan sonra keçirilən mətbuat konfransında çıxış edən UNRWA-nın komissarı general Filip Lazzarini verib.
“Mayın 1-nə olan məlumata görə, hərbi əməliyyatların başlanmasından bəri həlak olan UNRWA personalının ümumi sayı 198 nəfər olub”, – Lazzarini deyib: “Köçkünlərin yerləşdiyi məktəblər də daxil olmaqla, BMT-nin 160 obyekti tamamilə və ya qismən dağıdılıb”.
UNRWA rəhbəri əs-Səfədinin Qəzza zolağında hərbi cinayətlərə görə məsuliyyət daşıyanların məsuliyyətə cəlb edilməsi üçün hərtərəfli və şəffaf beynəlxalq araşdırma tələb edən bəyanatını dəstəkləyib. “Bəli, cinayət törətmiş şəxslərin məsuliyyətə cəlb edilməsinin vaxtı çatıb”, o vurğulayıb.
UNRWA rəhbərinin sözlərinə görə, beynəlxalq ictimaiyyətin İsrailin qaçqınların yarısının sığındığı Rəfah şəhərinə hücum etməmək barədə bütün çağırışlarına baxmayaraq, işğal mayın 6-dan başlayıb. (Tass)