Avqust ayında İsrail Müdafiə Qüvvələrinin Qəzza zolağında keçirdiyi əməliyyatlar 250 min insanın məcburi təxliyəsinə səbəb olub. Bu barədə BMT-nin İşğal olunmuş Fələstin Ərazilərindəki Humanitar Məsələlərin Əlaqələndirilməsi Ofisi (OCHA) məlumat yayıb.
“Avqustun 21-nə olan məlumata görə, bu ay verilən təxliyə əmrləri təxminən 250 min Qəzzalıya təsir göstərib”, – OCHA hesabatında deyilir.
Sənəddə qeyd olunduğu kimi, İsrail ordusu avqustun 1-dən avqustun 22-dək mülki şəxslər üçün 13 təxliyə əmri verib ki, bu da Deyr əl-Bəlah və Xan Yunisə təsir edib. Eyni zamanda, avqustun 21-də və 22-də üç belə göstəriş verilib ki, bu da daha 28,5 min nəfərin məcburi köçkünə çevrilməsinə səbəb olub. Beynəlxalq təşkilatın məlumatına görə, onlar anklavda fəaliyyət göstərən 146 qaçqın düşərgəsində yerləşdirilib.
Hesabat müəllifləri qeyd edirlər ki, evakuasiya əmrləri BMT, qeyri-hökumət və humanitar işçilərin də yerdəyişməsinə səbəb olub. (Tass)