Yay mövsümündə tərləmə ilə itirdiyimiz su dehidratasiya (orqanizmin susuzlaşması) yarada bilər. Bu da bağırsaqlardakı suyun geri sorulması və nəticədə qəbizliyin yaranması ehtimalını artırır. Yay aylarında yetərincə maye qəbul etməliyik və orqanizmi istilənməkdən qorumalıyıq.AZƏRTAC xəbər verir ki, bu barədə Səhiyyə Nazirliyi Sanator-Kurort Reabilitasiya Mərkəzinin qastroenteroloqu Saniyə Şahverənova bildirib. O deyib ki, orqanizmin istidən daha bir qorunma mexanizmi dəriyə qan axınını artıraraq bədən hərarətini aşağı salmaqdır. Bu da mədə-bağırsaqda gedən qan dövranını zəiflətdiyi üçün həzm çətinliyi, yəni köp, toxluq, ağırlıq hissi yarada bilər.”Eyni zamanda, bir çox insanlarda isti havalar zamanı iştahasızlıq müşahidə olunur. Bu da müntəzəm qidalanmaya vərdiş edən orqanizmdə ifraz olunan ödün, xlorid turşusunun mədə-bağırsaqdakı selikli qişalara qıcıqlandırıcı təsiri və nəticədə qıcqırma, mədə ağrısı, mədə yanğısı kimi şikayətlərə səbəb ola bilər”, – deyə qastroenteroloq əlavə edib.
