Qazaxıstan və Rusiya Xarici İşlər nazirliklərinin nümayəndə heyətləri Almatıda bioloji təhlükəsizlik üzrə idarələrarası ikitərəfli məsləhətləşmələr keçirib. Bu barədə Respublika Xarici İşlər Nazirliyinin mətbuat xidməti məlumat yayıb.
“Məsləhətləşmələr zamanı tərəflər iki dövlətin ərazisində biotəhlükəsizlik sahəsində ümumi vəziyyətlə bağlı cari məlumat mübadiləsi aparıb, ikitərəfli əməkdaşlığın gələcək inkişaf perspektivlərini nəzərdən keçirib və qarşılıqlı fəaliyyətin bəzi praktiki tədbirlərini müzakirə ediblər. Elmi mübadilə, mütəxəssislərin hazırlanması və sərhədyanı ərazilərdə epidemioloji vəziyyətin monitorinqi üzrə birgə fəaliyyət məsələlərinə xüsusi diqqət yetirilib”, – məlumatda deyilir.
Tərəflər həmçinin Beynəlxalq Bioloji Təhlükəsizlik Agentliyinin yaradılması üzrə Qazaxıstan təşəbbüsünün gələcək həyata keçirilməsi və Bioloji və Toksin Silahları Konvensiyasının gücləndirilməsi üzrə Rusiyanın təşəbbüsləri barədə konstruktiv fikir mübadiləsi aparıblar. Qazaxıstan nümayəndə heyətinə Xarici İşlər Nazirliyinin Beynəlxalq Təhlükəsizlik Departamentinin direktoru Arman Baysuanov, Rusiya nümayəndə heyətinə isə Xarici İşlər Nazirliyinin Nüvə Silahlarının Yayılmaması və Silahlara Nəzarət Departamentinin direktor müavini Konstantin Vorontsov başçılıq edib.