BMT-nin Baş katibi Antonio Quterreş İsrailin Nuseyrat qaçqın düşərgəsinə endirdiyi və BMT-nin Fələstinli Qaçqınlara Yardım Agentliyinin (UNRWA) əməkdaşları da daxil olmaqla, 18 nəfərin ölümü ilə nəticələnən zərbənin hərtərəfli və müstəqil araşdırılmasına çağırıb. Bunu jurnalistlər üçün keçirdiyi brifinqdə təşkilatın baş katibinin rəsmi nümayəndəsi Stefan Düjarrik deyib.
“Baş katib sentyabrın 11-də uşaqlar, qadınlar və 6 UNRWA əməkdaşı da daxil olmaqla, ən azı 18 nəfərin ölümünə səbəb olan İsrail hava hücumlarını pisləyir. Bu insident münaqişədə həlak olan UNRWA əməkdaşlarının sayını 220-yə çatdırıb. IDF bildirib ki, Hədəf kompleks daxilindəki komanda-nəzarət qülləsi idi. Bu hadisə müstəqil və hərtərəfli araşdırılmalıdır ki, məsuliyyət daşıyanlar məsuliyyətə cəlb olunsunlar”.
Quterreş həmçinin bütün tərəfləri “məktəblərdən, sığınacaqlardan və ətraf ərazilərdən hərbi məqsədlər üçün istifadə etməkdən çəkinməyə” və “həmişə beynəlxalq humanitar hüquqa hörmət etməyə” çağırır.
Bundan əvvəl UNRWA, Qəzza zolağının mərkəzindəki Nuseyrat qaçqın düşərgəsindəki məktəbə və ətrafına iki hava hücumu nəticəsində altı əməkdaşının həlak olduğunu bildirmişdi. Agentlik vurğuladı ki, bu, bir insident nəticəsində həlak olan ən çox işçidir. Ölənlər arasında qaçqınların qəbulu mərkəzinin müdiri də var.
(Tass)