Qəzza zolağının cənubundakı Rəfah şəhərindəki Əmirliyin Doğum Xəstəxanası İsrail hərbi əməliyyatları səbəbindən xəstələrin qəbulunu dayandırıb. Bu barədə Reuters agentliyi BMT-nin Əhali Fonduna (UNFPA) istinadən xəbər verir.
Qeyd olunur ki, adıçəkilən xəstəxanada hər gün orta hesabla 85 uşaq doğulur. Eyni zamanda, Rəfahın kənarında hərbi əməliyyatların qızışmasından əvvəl hər gün Qəzzada ümumilikdə 180 körpə doğulub.
Çərşənbə axşamı İsrail Müdafiə Qüvvələrinin mətbuat xidməti bildirib ki, İsrail hərbçiləri Qəzza zolağının Misirlə sərhədindəki Rəfah keçidinin Fələstin tərəfinə nəzarəti ələ keçirib. Bundan əlavə, mətbuat xidməti Rəfahın şərq hissəsində məqsədyönlü əks-terror əməliyyatının başlanması, o cümlədən ərazidə HƏMAS-ın hərbi obyektlərinə zərbələrin endirilməsi və 20 silahlı radikalın məhv edilməsi barədə məlumat verib. (Tass)
