Birləşmiş Ştatlar Çinin yarımkeçirici sənayesinin inkişafının qarşısını almaq məqsədi daşıyan tədbirlər çərçivəsində 140 Çin şirkətinə öz məhsullarının tədarükünə məhdudiyyətlər qoymaq niyyətindədir. Bu barədə “Reuters” iki mənbəyə istinadən məlumat yayıb.
Onların məlumatına görə, yeni tədbirlər yaddaş çiplərinin və mikrosxemlərin istehsalı üçün avadanlıqların Çinə ixracını məhdudlaşdırmaq məqsədi daşıyır və müvafiq lisenziya olmadan bəzi Çin şirkətlərinə Amerika məhsullarının tədarükünə qadağa qoyulmasını nəzərdə tutur. Agentlik mənbələri qeyd edir ki, məhdudiyyətlərlə üzləşəcək Çin şirkətləri arasında 20-yə yaxın yarımkeçirici istehsalçısı, iki investisiya şirkəti və yarımkeçirici sənayesində 100-dən çox avadanlıq istehsalçısı var. Bu qərar xüsusilə Naura Technology Group, Piotech və SiCarrier Technology kimi korporasiyalara təsir edəcək.
Reuters-in məlumatına görə, məhdudiyyətlərə məruz qalan bəzi şirkətlər əvvəllər sanksiyaların nəticələrindən əziyyət çəkən, lakin sonradan Çinin yarımkeçirici sənayesinin lideri olan “Huawei” korporasiyası ilə əməkdaşlıq edir. Bundan əlavə, ABŞ Çinin ən böyük müqaviləli çip istehsalçısına – Semiconductor Manufacturing International-a öz məhsullarının tədarükünə əlavə məhdudiyyətlər tətbiq etmək niyyətindədir.
Agentlik qeyd edir ki, ABŞ-ın çip istehsalı avadanlığının ixracını məhdudlaşdıran yeni tədbirləri Malayziya, Sinqapur, İsrail və Cənubi Koreyada istehsal olunan məhsullara şamil edilir. İndiyə qədər istisnalar, ABŞ ilə birlikdə mikrosxemlərin istehsalı üçün avadanlıq istehsalçıları arasında lider mövqeləri tutan Hollandiya və Yaponiyadır. (Tass)