ABŞ Konqresinin Nümayəndələr Palatasının respublikaçı üzvləri prezident Co Baydenin potensial olaraq impiçmentə səbəb ola biləcək hərəkətləri barədə hesabat yayıblar. Bu barədə “Reuters” müvafiq sənədə istinadən məlumat yayıb.
Bu məlumatlara görə, 2014-cü ildən bəri Bayden və ailəsi “xarici şəxslərlə əməliyyatlar vasitəsilə varlanmaq üçün təsir ticarəti sxemindən faydalanıblar”. Xüsusilə, bu hadisələrin araşdırılmasında iştirak edən Nümayəndələr Palatasının üzvləri hesab edirlər ki, Ağ Evin sahibi öz nüfuzundan “oğlu Hunterin xarici tərəfdaşlarla işgüzar əlaqələrini inkişaf etdirmək” üçün istifadə edib. Sənəddə deyilir: “Komitələr bu məlumatları nəzərdən keçirmək və müvafiq növbəti addımlar barədə qərar qəbul etmək üçün Nümayəndələr Palatasına təqdim edəcəklər”.
Agentlik dəqiqləşdirir ki, hesabat Nümayəndələr Palatasının üç komitəsi tərəfindən hazırlanıb. Bununla belə, Reuters qeyd edib ki, Nümayəndələr Palatasının hesabatı nəzərdən keçirdikdən sonra impiçmentə səs verib-verməyəcəyi hələ də qeyri-müəyyən olaraq qalır. Bundan əlavə, hətta bu halda da Baydenin impiçmentə məruz qalması ehtimalı azdır, çünki bu, dövlət başçısının eyni partiya üzvləri tərəfindən idarə olunan Senatın müvafiq qərarı tələb edir. (Tass)