ABŞ İsrail və İran arasında münaqişə fonunda B-2 strateji bombardmançılarını Sakit okeandakı Quam adasına köçürür. Bu barədə “Reuters” öz mənbələrinə istinadən məlumat yayıb.
Agentlik vurğulayır ki, bombardmançıların yerləşdirilməsinin Yaxın Şərqdəki gərginliklə bağlı olub-olmadığı aydın deyil. Agentliyin mənbələri əlavə məlumat verməkdən imtina ediblər. Həmsöhbətlərdən biri deyib ki, B-2-lərin Quamdan kənara daşınması ilə bağlı hələ heç bir əmr verilməyib. Onlar neçə bombardmançının yerləşdirildiyini açıqlamayıblar.
ABŞ prezidenti Donald Tramp İranın nüvə proqramına zərbə endirmək imkanlarını araşdırır və şənbə günü məsələni nəzərdən keçirmək üçün milli təhlükəsizlik komandası ilə növbəti görüş keçirəcəyi gözlənilir.
B-2 bombardmançı təyyarəsi yerin dərinliklərində yerləşən hədəfləri məhv etmək üçün nəzərdə tutulmuş Amerika GBU-57 hava bombası ilə təchiz oluna bilər. Mütəxəssislərin fikrincə, məhz bu mərmi təxminən 90 metr dərinlikdə yerləşən Fordodakı nüvə obyektinə zərbə endirmək üçün istifadə oluna bilər. (Tass)