Bir sıra ölkələrdə, o cümlədən ABŞ-da demokratik institutlara və ümumilikdə demokratiyaya inam böhranı müşahidə olunur. Bu barədə Stokholmda yerləşən Demokratiya və Seçkilərə Yardım üzrə Beynəlxalq İnstitutun (IDEA) hesabatına istinadən Reuters agentliyi məlumat yayıb .
2023-cü ilin iyul ayından 2024-cü ilin yanvar ayına qədər təxminən 1500 nəfərin IDEA sorğusuna əsaslanan araşdırma, ABŞ və Hindistan da daxil olmaqla 19 ölkədən 11-də seçicilərin yarısından azının son seçkilərin azad və ədalətli olduğuna inandığını müəyyən edib. Bununla belə, yalnız Danimarka sakinləri öz məhkəmə sisteminə yüksək inam səviyyəsini qeyd ediblər. Sorğular göstərib ki, ABŞ-da respondentlərin yalnız 47%-i ölkədə mötəbər seçki proseslərinin olduğuna əmin olduğunu bildirib.
Hesabatda həmçinin “parlament və ya seçkilərdən narahat olmayan güclü lider” ideyasını dəstəkləyənlərin sayı artıb. IDEA-nın baş direktoru buna görə də demokratiyaları “həm idarəetməni təkmilləşdirməklə, həm də etibarlı seçkilərlə bağlı saxta ittihamları təbliğ edən artan dezinformasiya mədəniyyəti ilə mübarizə aparmaqla öz əhalisinin skeptisizminə cavab verməyə” çağırıb.
Demokratik təsisatlara inamın azalması xüsusilə Avropa ölkələrində sağ partiyaların və liderlərin mövqelərinin güclənməsi fonunda baş verir. 2022-ci ildən İtaliya, İspaniya, Hollandiya və Slovakiyada keçirilən parlament seçkilərində belə partiyalar qalib gəlib.
(Tass)