Yeddilik Qrupu (G7) ölkələrinin liderləri fevralın sonunda görüşəcəkləri zaman Rusiyanın dondurulmuş 300 milyard dollarlıq aktivlərinin mümkün müsadirəsi üçün ABŞ-ın hazırladığı nəzəriyyə və hüquqi əsasları müzakirə edəcəklər. Bu barədə Reuters məsələ ilə tanış olan iki şəxsə və bir britaniyalı məmura istinadən məlumat yayıb.
Mənbələrdən birinə görə, “Birləşmiş Ştatlar Rusiya aktivlərinin “müəyyən şərtlərlə” müsadirə edilməsinə imkan verəcək hüquqi nəzəriyyə hazırlamağa nail olub. Onun yaradıcıları ümid edirlər ki, bu nəzəriyyə “beynəlxalq səviyyədə məhkəmələrdə dəstəklənəcək” və qanuni sayılacaq. Agentliyin həmsöhbətlərinin sözlərinə görə, ABŞ nümayəndələri G7 üzvlərinin fevralda keçiriləcək qrupun toplantısında Rusiya aktivlərinin müsadirə edilməsi ilə bağlı qərarın açıqlanacağını gözləmirlər, lakin onlar ümid edirlər ki, G7 liderləri bu məsələ ilə bağlı “daha qəti bəyanatla razılaşacaqlar”.
İki mənbə müsadirə ilə bağlı yekun qərarın hələ verilmədiyini vurğulayıb. Bundan əlavə, bu cür istisnaların həyata keçirilməsi üçün ABŞ və Böyük Britaniya da daxil olmaqla bir neçə ölkənin qanunlarına düzəlişlər etmək lazımdır. Reuters-in həmsöhbətlərindən biri aydınlaşdırıb ki, ideyanın təşəbbüskarlarının digər ölkələri layihəyə qoşulmağa razı salmaq üçün çox işi var. O əlavə edib ki, bəzi ölkələr “yalnız bütün Avropa ölkələri” planı dəstəklədiyi təqdirdə müsadirələrdə iştirak etməyə razı olacaqlar. (Tass)