Noyabrda keçiriləcək seçkilər nəticəsində ABŞ-ın keçmiş prezidenti Donald Trampın hakimiyyətə gələ biləcəyi ehtimalı fonunda Avropa ölkələri müdafiə sektoruna investisiyaları aktiv şəkildə artırır, kiçik və orta biznes nümayəndələrini cəlb edir. Bu barədə Reuters agentliyi investorlara və şirkət rəhbərlərinə istinadən məlumat yayıb.
Agentlik Stokholm Beynəlxalq Sülh Araşdırmaları İnstitutunun (SIPRI) məlumatlarına istinad edərək, 2019-2023-cü illər ərzində Avropa ölkələrinin silah alışının təxminən iki dəfə artdığını bildirib. Reuters-in qeyd etdiyi kimi, bu, qismən Ukraynada davam edən münaqişə, Yaxın Şərqdəki vəziyyət, eləcə də əvvəllər ABŞ-ı NATO-dan çıxmaqla hədələyən Trampın Ağ Evə qayıtması riski ilə bağlıdır. Agentlik əlavə edib ki, bununla yanaşı, Avropa ölkələri böyük hərbi konsernlərə deyil, kiçik startap şirkətlərinə getdikcə daha çox diqqət yetirirlər.
“Trampın təhdidləri Avropa ölkələrini öz layihələrinə sərmayə qoymaq və əksər hallarda startaplarla müqavilələr bağlamaq barədə fərqli düşünməyə vadar edib”, – Almaniyanın Vsquared şirkətinin təsisçilərindən biri Herbert Mangesius bildirib. O qeyd edib ki, Avropa ölkələri müdafiə sektorunda daha çox eksperiment aparmaq və yeni inkişaf imkanları əldə etmək istəyir, ona görə də vençur fondlarına tələbat getdikcə artır. (Tass)