ABŞ dövlət katibi Marko Rubio ABŞ prezidenti Donald Trampın NATO və Vaşinqtonun alyansdakı müttəfiqlərinin Ukrayna üçün Amerika silahlarının pulunu tam ödəyəcəkləri ilə bağlı bəyanatına aydınlıq gətirib.
Tramp müvafiq bəyanatı iyulun 10-da NBC News telekanalına müsahibəsində verib . O qeyd edib ki, Amerika silahlarının Ukraynaya çatdırılması üçün belə prosedura dair razılaşmalar Şimali Atlantika Alyansının iyun ayında keçirilən sammitində əldə olunub.
“Ukrayna və Avropaya artıq bu fürsət verilib, yəni ABŞ-dan silah alıb sonra onları Ukraynaya ötürmək. Ukraynaya lazım olan bəzi sistemlər, Avropa istehsal etmir, ona görə də onlar ABŞ-dan nəsə almalıdırlar. Ukraynanın tələb etdiyi müəyyən miqdarda silah ABŞ-ın NATO-dakı müttəfiqləri, məsələn, Almaniya üçün mövcuddur. Ukraynanın ehtiyac duyduğu silahlar, müdafiə sistemləri və sonra onlar ehtiyatlarını artırmaq üçün bizimlə ayrıca maliyyə sazişləri bağlaya bilərlər”, – Rubio Kuala-Lumpurda ASEAN-ın iclasları kənarında jurnalistlərin suallarını cavablandırarkən deyib.
O vurğulayıb ki, mahiyyət etibarı ilə söhbət Ukraynaya silah tədarükü üçün hansısa yeni sxemdən deyil, daha çox 2022-ci ildə münaqişə başlayandan bəri fəaliyyətdə olan təchizat marşrutlarından birinin aktivləşdirilməsindən gedir.
“Almaniyadakı anbardan nəyisə köçürmək fabrikdən yeni bir şey sifariş etməkdən qat-qat tezdir. Buna yanaşmağın bir neçə yolu var, lakin nəticə ondan ibarətdir ki, hazırda artıq istehsal olunmuş silahları Avropadan Ukraynaya ötürmək imkanı var. Düşünürəm ki, prezident Trampın danışdığı aspekt budur”, – Rubio əlavə edib.