Rusiya Avropa İttifaqının rus mediasına və jurnalistlərə qarşı son məhdudiyyətlərinə adekvat və proporsional cavab verəcək. Bu barədə Rusiya Xarici İşlər Nazirliyinin rəsmi nümayəndəsi Mariya Zaxarovanın şərhində deyilir.
O qeyd edib ki, “Aİ etiraz edən mediaya və jurnalistlərə qarşı qeyri-qanuni və antidemokratik qadağanedici tədbirləri təkrarlamaqla hər hansı alternativ məlumat mənbələrinin kökünü kəsmək cəhdlərindən əl çəkmir. “Tsargrad” və “Spas” telekanallarına, eləcə də “Zvezda” media holdinqinin analitik radio proqramları departamentinin rəhbəri Anna Şafrana qarşı qanunsuz sanksiyalar tətbiq edilib”. “Sözügedən “sanksiyalar”a adekvat və proporsional cavab tədbirləri qaçılmaz olaraq gələcək”, – Zaxarova vurğulayıb.
Departament həmçinin qeyd edib ki, Rusiya mediasına yeni məhdudiyyətlərlə Aİ media azadlıqlarının qorunması məsələlərində liderliyə iddiaların əhəmiyyətsizliyini bir daha sübut edib. (Tass)