Şəki Dövlət Dram Teatrında Azərbaycan klassik dramaturgiyasının banisi M.F.Axundzadənin “Hekayəti-Xırsi-Quldurbasan” komediyası əsasında səhnələşdirilmiş eyniadlı tamaşanın premyerası olub.
Bu barədə AZƏRTAC-ın bölgə müxbirinə teatrın ədəbi dram hissəsinin rəhbəri Lalə Məmmədova məlumat verib.
Tamaşanın quruluşçu rejissoru Orxan Həmidli, quruluşçu və geyim üzrə rəssamı Sahib Əhmədov, baletmeysteri Çingiz Novruzəliyev, musiqi tərtibatçısı Zeynəb Xəlilovadır. Səhnə əsərində rolları Əməkdar artist Rəhim Qocayev, aktyorlar Xəyal Salahov, Hariz Əhmədov, Nərmin Abbasova, Çingiz Novruzəliyev, Lalə Məmməd, İlkin Rüstəmov, Rəşid Mirizadə, Rəsul Məmmədrəhimov, Pərviz İsmayılov, Orxan Həmidli, Qurban Rəsulov, Elvin Mabudov, Azad Məmmədov və Rəşad Rüstəmov ifa ediblər.
Lalə Məmmədova bildirib ki, hazırda teatrda 4-cü rüb üçün repertuar plana daxil edilən görkəmli alman ədibi Bertolt Brextin “Kuraj ana və uşaqları” pyesi əsasında hazırlanacaq yeni tamaşanın stolarxası məşqlərinə başlanılıb. Tamaşanın quruluşçu rejissoru teatrın baş rejissoru, Əməkdar incəsənət xadimi Mirbala Səlimlidir.