Kataliz və Qeyri-üzvi Kimya İnstitutunda Azərbaycan Texniki Universitetinin Yeni Materiallar və Nanotexnologiya Elmi Tədqiqatlar Mərkəzinin rəhbəri professor Həmdulla Mehrabov “Sənaye tətbiqləri üçün üstün xassəli materialların dizaynı, sintezi və inkişaf etdirilməsi” mövzusunda elmi seminar keçib.
Bu barədə AZƏRTAC-a institutdan məlumat verilib.
Tədbirdə institutun icraçı direktoru, AMEA-nın müxbir üzvü Məhəmməd Babanlı bildirib ki, müxtəlif tətbiq sahələrinə malik funksional materialların sintez yollarının axtarıb tapılması və ya mövcud olanların daha da təkmilləşdirilməsi dünyanın aktual problemlərindən biridir. Bu baxımdan mövzu çox əhəmiyyətlidir.
Sonra professor H.Mehrabovun mövzu üzrə təqdimatı olub. Təqdimatda Orta Doğu Texniki Universitetinin Metallurgiya və material mühəndisliyi kafedrasının Yeni ərintilərin dizaynı və inkişafı laboratoriyasında və Azərbaycan Texniki Universitetin Yeni Materiallar və Nanotexnologiyalar Elmi Tədqiqatlar Mərkəzində texnoloji tətbiqlər üçün yeni üstün xassəli materialların dizaynı, sintezi və inkişaf etdirilməsi haqqında geniş məlumat verilib. Eyni zamanda, professorun rəhbərliyi altında 50 ildən artıq məşğul olduqları və onlar tərəfindən işlənib-hazırlanmış “Modelləşdirmə və simulyasiya”ya əsaslanan “ərinti dizaynı” üçün “Hesablamalı materialşünaslığın” əsas prinsipləri və aspektləri təqdim olunub. Dinləyicilərə yeni materialların dizayn edilməsi üçün müasir yanaşmanın tətbiqi haqqında məlumat verilib.
Sonra iştirakçıların sualları cavablandırılıb.