Sərhədsiz Həkimlər İsrail hərbçilərinin Qəzza zolağının şimalındakı hərəkətlərində etnik təmizləmə əlamətləri görüblər. Bu barədə təşkilatın hesabatında deyilir.
Orada qeyd olunur ki, İsrailin Qəzza zolağının şimalındakı son hərbi əməliyyatları “İsrail silahlı qüvvələrinin Qəzzaya qarşı apardığı müharibənin vəhşiliyini açıq şəkildə nümayiş etdirir”. Sənəddə deyilir: “Biz fələstinlilərin etnik təmizləmə əlamətlərini görürük, çünki bölgədə fələstinlilərin mövcudluğu məhv edilir”.
Təşkilatın İsrailə aid edilən hərəkətlərin qəsdən həyata keçirildiyini bildirmək səlahiyyətinin olmadığı vurğulanır. Lakin hesabatda “etnik təmizləmə əlamətləri” inkaredilməz kimi səciyyələndirilir. Sərhədsiz Həkimlər qeyd edir ki, onların müşahidələri İsraili “etnik təmizləmə”də və fələstinlilərə qarşı soyqırımda ittiham edən digər beynəlxalq təşkilatların qiymətləndirmələrinə uyğundur.
Bununla əlaqədar olaraq, təşkilat dərhal atəşkəs əldə etməyə, bölgəyə humanitar yardıma çıxış imkanlarının artırılmasına və fələstinlilərin yaşayış yerlərindən “zorla çıxarılması” praktikasına son qoymağa çağırır. Təşkilatın mətbuat xidməti baş katib Kristofer Lokyerdən sitat gətirir: “Qəzza sakinləri apokalipsisdən sağ çıxmağa çalışırlar, lakin onlar üçün heç bir yerdə təhlükəsizlik yoxdur, heç kimə mərhəmət yoxdur və bu dağılmış anklavı tərk etmək üçün heç bir yol yoxdur”. (Tass)