Salyan Dövlət Rəsm Qalereyasında “Akvarel yağışı” adlı rəsm sərgisi keçiriləcək.Şirvan-Salyan Regional Mədəniyyət İdarəsindən AZƏRTAC-ın bölgə müxbirinə bildirilib ki, “Yaşıl dünya naminə həmrəylik ili” çərçivəsində baş tutacaq sərgidə Salyandan olan 30 nəfərədək yeniyetmə və gənc rəssamın 40-dan çox əl işi nümayiş olunacaq. Yalnız akvarellə çəkilən rəsmlərdə gənc rəssamlar ana təbiəti, əsasən də çiçəkləri tərənnüm ediblər. Sərginin açılış mərasimi 22 noyabr-da Salyan Dövlət Rəsm Qalereyasının ekspozisiya zalında olacaq. Sərgi boyu Salyan Rayon Mədəniyyət Mərkəzinin solistlərinin ifasında canlı musiqilər səslənəcək. Sərgiyə giriş sərbəstdir.
