“Report”un Ankara bürosunun xəbərinə görə, Türkiyə paytaxtında keçirilən Türk Dövlətləri Təşkilatının kosmik agentlik rəhbərlərinin üçüncü toplantısında (STC 2024) çıxış “Azərkosmos”un İdarə Heyətinin sədri Saməddin Əsədov bildirib.

Onun sözlərinə görə, Mərkəzi Asiya ölkələri arasında fundamental əməkdaşlıq üçün birgə fəaliyyətlərə ehtiyac var: “Azərkosmos” həmişə kosmik sahədə əməkdaşlığı alqışlayıb. Biz regional əməkdaşlığı inkişaf etdirməyi hədəfləyirik. Yaxın tarix, xüsusən də son bir neçə ildəki hadisələri müşahidə etdikdə aydın olur ki, kosmos özəl bizneslə birlikdə daha sürətlə demokratikləşir”.

O qeyd edib ki, kosmik uçuşlar, kosmik turizm, kəşfiyyat missiyaları, təməlqoyma başlanğıcları və əhəmiyyətli texniki nümayişlər müasir kosmos tarixinin əsas hissələridir: “Təbii ki, regionumuzda kosmosdan daha çox fayda əldə etmək üçün biz əməkdaşlıq etməli və qüvvələrimizi səfərbər etməliyik”.

Qeyd edək ki, Türkiyənin ev sahibliyi ilə keçirilən beynəlxalq konfransda Türkiyə, Azərbaycan, Çin, Özbəkistan, Sinqapur, Qazaxıstan və digər Avrasiya ölkələrinin regional kosmik agentliklərinin nümayəndələri öz milli kosmik sektorlarının inkişafı, regional təşəbbüslərin və beynəlxalq tərəfdaşlıqların inkişafı üçün təkliflərini, prioritetlərini və strategiyalarını səsləndirirlər. 3 gün davam edən tədbir aprelin 26-da kosmos sahəsində müxtəlif panellərdə müzakirələrlə başa çatacaq.