Belqradda Ali Dövlət Prokurorluğunun Korrupsiyaya Qarşı Xüsusi İdarəsi ABŞ-ın Beynəlxalq İnkişaf Agentliyinin (USAID) Serbiyadakı ofisi tərəfindən vəsaitlərin sui-istifadəsi ilə bağlı cinayət işi açıb və ABŞ Ədliyyə Departamentinə təhqiqat üçün zəruri olan məlumatları təqdim etmək üçün sorğu göndərib.
“ABŞ Ədliyyə Departamentindən sübutların əldə edilməsində, məlumatların və ya mümkün ekspert rəylərinin təqdim edilməsində, banklardan və ya digər maliyyə institutlarından maliyyə, iqtisadi və ya biznes qeydlərinin (müqavilələr, hesablar) təqdim edilməsində, habelə cinayətdən əldə edilən gəlirlərin və ya Serbiya Respublikasında cinayət prosesində sübut kimi xidmət edə biləcək digər əşyaların səlahiyyətli məhkəmədə müəyyən edilməsində və ya aşkar edilməsində köməklik göstərməsi xüsusi olaraq xahiş olunur”, – Belqrad Prokurorluğunun mətbuat xidməti bildirib.
ABŞ-a sorğu Serbiyanın Ədliyyə Nazirliyi vasitəsilə göndərilib. Prokurorluq hazırda naməlum şəxslər qrupunun əməllərində Serbiya Cinayət Məcəlləsinin “Vəzifə səlahiyyətlərindən sui-istifadə” və “Çirkli pulların yuyulması” maddələri üzrə cinayət tərkibinin olmasını müəyyən etmək niyyətindədir. Prokuror Nenad Stefanoviçin sözlərinə görə, bir neçə qeyri-hökumət təşkilatının (QHT) və ona bağlı Serb konsaltinq firmalarının hesablarında vəsaitin həddən artıq cəmləşməsi, eləcə də vəsaitlərin yalnız dar bir resipiyent dairəsi arasında bölüşdürülməsi prosesinin qeyri-şəffaflığı “ABŞ-ın vəsaitlərinin qanuni şəkildə xərclənməsinə şübhə etmək üçün əsasların olduğunu göstərir”. Serbiyanın hüquq-mühafizə orqanları dörd QHT-nin USAID qrantları ilə bağlı bütün sənədləri ələ keçirib. Prokurorluq həmçinin qeyd olunan təşkilatların ödəniş əməliyyatlarını yoxlamaq üçün Serbiya Milli Bankına və Çirkli Pulların Yuyulmasına Qarşı Mübarizə İdarəsinə sorğular göndərib. (Tass)
