Şanxay Əməkdaşlıq Təşkilatı (ŞƏT) ölkələrinin milli əlaqələndiriciləri ŞƏT-ə üzv ölkələrin Xarici İşlər Nazirlikləri rəhbərlərinin Astanada keçiriləcək görüşünə hazırlıq məsələlərini müzakirə ediblər. Bu barədə Qazaxıstan Xarici İşlər Nazirliyinin mətbuat xidməti məlumat yayıb.
“Tədbirin gündəmində mayın 20-21-də Astanada keçiriləcək ŞƏT-ə üzv ölkələrin Xarici İşlər Nazirləri Şurasının iclasına hazırlıq məsələləri dayanır. Milli koordinatorlar ŞƏT-də siyasət, təhlükəsizlik, iqtisadiyyat və mədəniyyət sahələrində əməkdaşlığın daha da gücləndirilməsinə yönəlmiş sənədlərə baxıblar”, – deyə məlumatda bildirilir.
Bundan əlavə, regional inkişafın aktual problemlərinin həllinə yönəlmiş Astana Bəyannaməsində ŞƏT-in “Ədalətli sülh və harmoniya naminə dünya birliyi haqqında” təşəbbüsü və bir sıra digər sənədlərin hazırlanması davam etdirilmişdir.
Qazaxıstan Şanxay Əməkdaşlıq Təşkilatına 2023-cü ilin iyulundan 2024-cü ilin iyulunadək sədrlik edir. ŞƏT-in növbəti sammitinin iyulun 3-4-də Astanada keçirilməsi planlaşdırılır. (Tass)