Çin sədri Si Cinpinin Tacikistana dövlət səfəri 2024-cü ilə planlaşdırılıb. Bunu Tacikistanın xarici işlər naziri Sirociddin Muxriddin Düşənbədə rəsmi səfərdə olan Çinin xarici işlər naziri Vanq Yi ilə görüşündə deyib.
“2024-cü ildə əlaqələrimizin gündəliyində duran əsas məsələ Çin Xalq Respublikasının möhtərəm sədrinin Tacikistana planlaşdırılan dövlət səfəridir”, – Tacikistan Xarici İşlər Nazirliyinin rəhbəri bildirib.
Çin lideri 2019-cu ilin iyununda Düşənbədə dövlət səfərində olub və Tacikistan prezidenti Emomali Rəhmonla danışıqlar aparıb. Sonra o, Tacikistanın paytaxtında keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (CICA) Beşinci Zirvə Toplantısında da iştirak edib. (Tass)