KXDR öz peyklərinin işinə istənilən müdaxiləni müharibə elanı kimi qiymətləndirəcək. Bu barədə Reuters Koreya Mərkəzi Xəbər Agentliyinə istinadən məlumat yayıb.
O qeyd edir ki, Şimali Koreya qanunları strateji hədəflərinə hücum qaçılmaz olarsa, hərbi çəkindirici qüvvələrin səfərbər edilməsini nəzərdə tutur.
Pxenyan həmçinin ABŞ-ın onun kosmik fəaliyyətinə istənilən müdaxiləsinə ABŞ kəşfiyyat peyklərinin effektivliyini azaltmaqla və ya tamamilə ləğv etməklə cavab verəcəyini vəd edir.
Noyabrın 21-də Şimali Koreya özünün kəşfiyyat peykini orbitə çıxarıb. Buna cavab olaraq, noyabrın 22-də Koreya Respublikası gərginliyi azaltmaq üçün Koreyalararası razılaşmanı qismən dayandırdığını elan edib. Bu tədbir uçuşa qadağan zonalar haqqında müddəalara aid idi. Noyabrın 23-də KXDR Müdafiə Nazirliyi artıq bütün razılaşmaya əməl etməyəcəyini və sənəddə qadağan olunmuş tədbirlərin tətbiqinə yenidən başlayacağını bəyan edib.
