“Azərbaycanın aqrar sahədə malik olduğu müqayisəli üstünlüklərinin reallaşdırılması və səmərəli ixtisaslaşmanın aparılması məqsədi ilə istehsalı yüksək iqtisadi səmərəliliyə malik olan meyvə bağlarının genişləndirilməsini stimullaşdırmaq üçün dövlət intensiv bağların salınmasını dəstəkləyir, böyük məbləğlərdə birdəfəlik subsidiyalar verilir. Bu tədbirlər nəticəsində sitrus meyvələrinin, o cümlədən çəyirdəkli meyvələrin, narın ixracı dəfələrlə artıb. Məsələn, 2022-ci ilin yanvar-sentyabr ayı ilə müqayisədə sitrus meyvələrinin ixracı 10 dəfədən çox, nar ixracı 3 dəfədən çox artıb”.
Bunu 1 Noyabr – Kənd Təsərrüfatı İşçiləri Günü münasibətilə AZƏRTAC üçün eksklüziv məqaləsində kənd təsərrüfatı naziri Məcnun Məmmədov bildirib.
Nazir qeyd edib ki, həmçinin torpaq-iqlimpotensialından və su ehtiyatlarından daha səmərəli istifadəni stimullaşdırmaq, ərzaqlıq buğda ilə özünütəminetmə səviyyəsini yüksəltmək üçün Azərbaycan Respublikası Prezidentinin 2022-ci il iyulun 9-da imzaladığı “Ərzaqlıq buğda ilə özünütəminetmə səviyyəsinin yüksəldilməsinə dair bir sıra tədbirlər haqqında” Fərmanla yeni dəstək mexanizmi yaradılıb. Yeni mexanizmə görə, artıq bu ildən pivot suvarma tətbiq edilməklə istehsal olunaraq Dövlət Ehtiyatları Agentliyinə və un dəyirmanlarına təhvil verilən ərzaqlıq buğdaya görə məhsul subsidiyası da ödənilir.
“Ümumilikdə aqrar sahəyə ayrılan subsidiyaların və güzəştlərin həcmi 2007-2022-ci illər ərzində nominal ifadədə 10 dəfəyə yaxın artaraq 450 milyon manat olub”, – deyə o əlavə edib.
Məqalənin geniş variantı ilə bu linkdə tanış ola bilərsiniz.
