Ukraynanın müdafiə naziri Denis Şmıxal bildirib ki, Kanada və Ukrayna Kiyevdə hərbi məhsulların birgə istehsalına dair saziş imzalayıblar.
“Ukrayna və Kanada müdafiə təyinatlı məmulatların birgə istehsalına dair razılığa gəliblər. Müvafiq saziş bu gün imzalanıb”, – Şmıxal öz Teleqram kanalında yazıb. “Saziş ikitərəfli müdafiə-sənaye əməkdaşlığını dərinləşdirməyə, Ukrayna və Kanadada yeni istehsal güclərinin genişləndirilməsinə və yaradılmasına yönəlib”.
Onun sözlərinə görə, əldə olunmuş razılaşmalar texnologiya mübadiləsini asanlaşdıracaq və “Ukrayna Silahlı Qüvvələrinin uzunmüddətli perspektivdə müasir silah və hərbi texnika ilə təmin olunmasına” kömək edəcək.
Kanadanın baş naziri Mark Karninin mətbuat xidməti öz növbəsində bildirib ki, Ukrayna və Kanada sənaye müəssisələrinə pilotsuz təyyarələrin istehsalı və alınması, bu cür sistemlərə qarşı elektron və digər tədbirlər üçün investisiyalar üçün 220 milyon Kanada dolları (təxminən 159 milyon dollar) ayrılması planlaşdırılır. (Tass)