Erkən nikah və qohum evliliklərinə qadağalar nəticə verməsə, cəzalar daha da sərtləşdirilməlidir.
“Report” xəbər verir ki, bunu Milli Məclis Aparatının Sosial qanunvericilik şöbəsinin müdiri Adil Vəliyev parlamentin Ailə, qadın və uşaq məsələləri komitəsinin bugünkü iclasında Ailə, Qadın və Uşaq Problemləri üzrə Dövlət Komitəsinin 2024-cü il üzrə məlumatının müzakirəsi zamanı deyib.
O xatırladıb ki, qohum evlilikləri haqqında qadağa bu il iyulun 1-də qüvvəyə minəcək:
“Həmçinin istisna hallarda nikah yaşının bir il azaldılması qadağası da ləğv edildi. Amma görünür ki, insanların çoxu bu dəyişikliyə hazır deyil. Məsələn, bu yaxınlarda Sabirabad rayonunda erkən yaşda ərə verilmiş qız qeyri-qanuni nikahda yaşadığı şəxs tərəfindən öldürülərək Kür çayına atılmışdı.
Təklif edirəm ki, intensiv monitorinqlər keçirilsin. Gələn ilin hesabatında erkən nikah və qohum evliliklərinə qadağaların effekti ilə bağlı nəticələr vurğulansın.
Əgər dəyişiklik olmasa, bununla bağlı daha sərt cəzaların tətbiqinə çalışmalıyıq”.